Улатӑр районӗнчи Кивӗ Эйпеҫре пурӑнакан 23 ҫулти йӗкӗте ҫар хӗсметне каясран тарса ҫӳренӗшӗн айӑплӑ тесе йышӑннӑ. Кун пирки «Чебоксары24» сайт пӗлтерет.

Хайхи ҫӑлкуҫ пӗлтернӗ тӑрӑх, ҫамрӑк ҫынна суд РФ УКн 328-мӗш статйин 1-мӗш пайӗнче каланипе килӗшӳллӗн явап тыттарнӑ, унран 20 пин тенкӗ шыраса илме йышӑннӑ. Каччӑ иртнӗ ҫулхи ака уйӑхӗнче повестка парсан та вырӑнти ҫар комиссариатне медицина, ҫар-тухтӑр тата призыв комиссийӗсем витӗр тухма пӗрре те пыман. Ҫав вӑхӑтрах чӗннӗ ҫӗре пымасӑр тӑма унӑн нимӗнле сӑлтав та пулман. Ку вара ҫар хӗсметӗнчен пӑрӑнма хӑтланни шутланать.

Палӑртса хӑвармалла, каччӑ хӑйӗн айӑпне йышӑннӑ. Унсӑр пуҫне вӑл ҫапла майпа преступлени тунине кӳнтеленсем те ҫирӗплетсе панӑ.

Улатӑр районӗнче виҫӗ ҫамрӑк тӗлӗшпе пуҫарнӑ пуҫиле ӗҫе тишкерсе пӗтернӗ, суда ярса панӑ.

Мӗнпе айӑпа кӗнӗ-ха ҫак каччӑсем? Вӗсене ҫынна хӑратса укҫа ыйтнӑшӑн айӑпласшӑн. Следстви пӗлтерӗ тӑрӑх, 2018 ҫулхи юпа уйӑхӗн 4-мӗшӗнче ҫӗрле Улатӑрта пурӑнакан 18 ҫул тултарман икӗ ҫамрӑк тата 22-ри каччӑ 19-ти пӗлӗшне вӑрмана илсе кайнӑ та алли-урине вӗренпе ҫыхса лартнӑ. Унтан вӗсем ӑна хӗненӗ, вӗлерессипе те хӑратнӑ. Анчах 300 пин тенкӗ парсан чӗрӗ-сывах юлассине пӗлтернӗ. Хайхискерсем вӑхӑт та панӑ: пӗр эрне. 19-ти каччӑ килӗшнӗ.

Ун чухне 16-ри каччӑ хур курнӑскерӗн телефонне уҫҫӑнах йӑкӑртнӑ. Палӑртмалла: вӑл унччен те йӗрке хуралҫисен аллине ҫакланнӑ.

Канаш районӗнче автотранспортӑн ҫӗнӗ маршручӗсене йӗркелеме палӑртаҫҫӗ. Ҫакна Чӑваш Енӗн Министрсен Кабинечӗ йышӑннӑ документра палӑртса хӑварнӑ. Маршрутсене Улатӑр, Комсомольски тата Муркаш районӗсенче ылмаштарасшӑн.

Чӑваш Енри муниципалитетсен хушшинчи транспорта йӗркелесси ҫинчен калакан ӗҫлӗ хута улшӑну кӗртнине ӑна йӗркелекенсем транспорт сетьене лайӑхлатассипе сӑлтавлаҫҫӗ. ЧР Элтеперӗн Администрацийӗн пресс-службинче ӗнентернӗ тӑрӑх, документа ҫынсем, районсен администрацийӗсем тата уйрӑм усламҫӑсем ыйтнипе ҫӗнетме йышӑннӑ.

Правительствӑн йышӑнӑвӗнче муниципалитетсем хушшинчи ҫӗнӗ 4 маршрут уҫма, 15 маршрутӑн схемине ылмаштарма тата 61 маршрута хупма йышӑннӑ. Хупма палӑртнисемпе е ҫӳрекен ҫук, е ун пек ҫулпа хутлаканнисем ахаль те пур.

Улатӑр районӗнчи Ахматово ялӗнче тухнӑ пушара сӳнтерсен ҫуннӑ япаласен айӗнче ҫын виллин пайӗсене тупнӑ. Кун пирки «Мой город Чебоксары» кӑларӑм хыпарлать.

Хайхи ҫӑлкуҫ пӗлтернӗ тӑрӑх, нарӑс уйӑхӗн 4-мӗшӗнче ҫӗрле Пушкин урамӗнчи харпӑр ҫурт ҫунма тытӑннӑ. Пушара асӑрханӑ ентешӗсем кун пирки пушар хуралне тӳрех пӗлтернӗ-ха, анчах ҫӑлавҫӑсем вырӑна ҫитнӗ вӑхӑта вут-ҫулӑм кил хуҫалӑхне тавраллах ярса илнӗ. Пушара сӳнтерме икӗ техника тата вунпӗр ҫын хутшӑннӑ. Апла пулин те пӳрте те, ытти хуралта та упраса хӑварма май килмен.

Палӑртса хӑвармалла, пушара сӳнтернӗ хыҫҫӑн ҫунӑк айӗнче ҫын кӗлеткин пайӗсене тупнӑ. Ҫав ҫын кам пулнине палӑртас тата вут мӗншӗн тухнине пӗлес тӗллевпе халӗ специалистсем тӗрлӗ тӗпчев ирттереҫҫӗ.

Паян ҫур ҫӗр иртни 1 сехет те 20 минутра Владимир облаҫӗнче микроавтобус КамАЗ ҫине пырса тӑрӑннӑ. Салонра Чӑваш Енри ҫынсем пулнӑ. 39 ҫулти водитель вӗсене, 14 пассажира, Шупашкартан Мускава илсе кайнӑ.

Авари «Атӑл М-7 ҫулӑн 214-мӗш ҫухрӑмӗнче пулнӑ. Малтанлӑха пӗлтернӗ тӑрӑх, КамАЗ водителӗ, Мускав енне каяканскер, руле итлеттереймен те ҫула уйӑракан барьер ҫине пырса кӗнӗ. Ҫав вӑхӑтра микроавтобус водителӗ тӑрук ӑнланса илеймен, пысӑк машинӑпа пырса ҫапӑннӑ та ӳпӗнсе кайнӑ.

Маршруткӑри виҫӗ ҫын вилнӗ, улттӑшӗ аманнӑ, вӗсене Владимирти пульницӑна илсе ҫитернӗ. Вӗсенчен иккӗшӗ – реанимацире. Вилнӗ ҫынсем Пӑрачкав тата Улатӑр районӗнчи ҫынсем тесе пӗлтереҫҫӗ.

Чӑваш Енре «Земство фельдшерӗ» патшалӑх программи пурнӑҫланса пырать. Пӗлтӗртенпе 30 ытла ҫамрӑк специалист республикӑри ялсене ӗҫлеме кайнӑ. Куншӑн вӗсене ҫур миллион тенкӗ компенсаци параҫҫӗ.

Тӗслӗхрен, Улатӑр районӗнчи Анютино ялӗнче ҫамрӑк фельдшер вӑй хурать. Унти фельдшерпа акушер пунктне тӑхӑр ялтан ҫӳреҫҫӗ. Ҫамрӑкскер ӗҫлеме килнӗренпа 8 уйӑх кӑна иртнӗ, апла пулин те ял ҫыннисем ӑна хӑнӑхнӑ.

Пӗлтӗр 19 ҫамрӑк специалист ялсенчи медпункта «Земство фельдшерӗ» программӑпа килӗшӳллӗн ӗҫлеме кайнӑ. Ҫапла майпа ялсенче медицина кадрӗсем халӗ ҫителӗклех. Кӑҫал ЧР Сывлӑх сыхлавӗн министерстви тепӗр 26 ФАП хута ярасшӑн. Эпин, ялсенче ҫамрӑк фельдшерсем тата кирлӗ пулӗҫ.

2020 ҫулта Чӑваш автономийӗ йӗркеленнӗренпе 100 ҫул ҫитет, ун чух ҫавра юбилея паллӑ тӑвӗҫ. Ҫавна май республика влаҫӗ Республика кунне ирттермелли района палӑртас тӗллевпе ӗҫлеме тытӑннӑ.

ЧР Строителсьвто министерстви пӗлтернӗ тӑрӑх, мероприятие йӗркелемелли заявкӑна хуласемпе районсем пуш уйӑхӗн 1-мӗшӗччен пама пултараҫҫӗ.

Аса илтерер: пӗлтӗр Республика кунӗ Красноармейски районӗнче иртнӗ, кӑҫал мероприятисем Улатӑр районӗнче йӗркеленӗҫ. Конкурсра ҫӗнтернӗ муниципалитет ЧР Элтеперӗн 10 миллион тенкӗ грантне тивӗҫет, унпа общество инфратытӑмне аталантараҫҫӗ.

Палӑртма хӑвармалла: Республика кунӗ ҫӗртме уйӑхӗн 24-мӗшӗнче Шупашкарта тата республикӑри пӗр муниципалитетра иртет.

Чӑваш Енри пульницӑсем «Ҫӗнӗ поликлиника» проектпа малалла ӗҫлеҫҫӗ. Кӑҫал ҫав программӑна тата тепӗр 4 учреждени кӗнӗ. Ҫапла вара йыш 22-е ҫитнӗ.

Ҫӗнӗлле ӗҫлекен пульницӑсен ертӳҫисемпе ӗнер Чӑваш Енӗн Сывлӑх сыхлав министерствинче канашлу иртнӗ. Унта «Создание новой модели медицинской организации, оказывающей первичную медико-санитарную помощь» (чӑв. Медицинӑпа санитарин пӗрремӗш пулӑшӑвне кӳрекен медицина организацийӗсене ҫӗнӗ меслет ҫине куҫарасси) проекта сӳтсе явнӑ. Канашлӑва пӗрремӗш министрӑн ҫумӗ Ирина Виноградова ертсе пынӑ.

«Ҫӗнӗ поликлиника» проекта кӑҫалтан Улатӑр районӗнчи тӗп пульницӑна, Ҫӗмӗрлери территорисем хушшинчи медицина центрне, Етӗрне тата Патӑрьел район пульницисене кӗртнӗ.

ЧР Сывлӑх сыхлав министерствинче ҫӗнӗлӗх халӑхшӑн тӑрӑшнипе ҫыхӑннӑ тесе ӗнентереҫҫӗ. Вӑхӑта перекетлӗ усӑ курнине пула тухтӑрсем папциентсемпе ытларах калаҫайӗҫ тесе шантараҫҫӗ.

Раштав каҫӗнче Улатӑр районӗнчи чукун ҫул каҫҫи патӗнче арҫын виллине тупнӑ. Халӗ ҫав арҫынна таптаса хӑварма пултарнӑ водителе шыраса тупнӑ, тытса чарнӑ. Кун пирки «ПроГород Чебоксары» хыпарлать.

Чиркӳ праҫникӗн кунӗнче Алтышево поселокӗнчи чукун ҫул каҫҫи тӗлӗнче 42 ҫулти ентешӗн виллине асӑрханӑ, ҫывӑхрах ҫӑмӑл автомобиль пайӗсем выртнӑ. Полици ӗҫченӗсем арҫынна машина таптаса хӑварма пултарнине палӑртнӑ, ҫавӑнпах таврари ялсене ҫитсе ҫаврӑннӑ. Нимӗнле информацисӗрех йӗрке хуралҫисем авари кам айӑпӗпе пулма пултарнине ӑнкарнӑ. Атрать ялӗнче ҫул-йӗр пӑтӑрмахӗ пулнӑ вырӑнта юлнӑ пайсемсӗр Renault Logan машинӑна курнӑ. Унӑн 27 ҫулти хуҫи Раштавра ҫула тухнине, анчах никама та ҫапса хӑварманнине каланӑ. Каярахпа аса илнӗ-мӗн: чукун ҫул урлӑ каҫма тӑрсан темӗскере пырса тӑрӑннӑ. Ун чухне вӑл машинӑран тухса та пӑхнӑ имӗш, анчах нимӗн те курман.

Палӑртмалла, ку тӗслӗхпе пуҫиле ӗҫ пуҫарнӑ, тӗпчев пырать.

Следстви комитечӗн сайтӗнчи сӑн

Чӑваш Енре васкавлӑ медпулӑшу машинин водительне вӗлернӗ арҫынна тытса чарнӑ. Кун пирки Следстви комитечӗ пӗлтерет.

Следстви пӗлтернӗ тӑрӑх, кӑрлач уйӑхӗн 4-мӗшӗнче Улатӑр районӗнчи Первомайски поселокӗнче кун кунлакан арҫын пӗрле пурӑнакан хӗрарӑмпа ҫапӑҫса кайнӑ, вӑл ҫырӑнмасӑр пурӑнакан арӑмне васкавлӑ медпулӑшун фельдшерӗ ҫумне кӗвӗҫнӗ. Хӗрсе кайнӑ арҫын сунар пӑшалне йӑтнӑ та васкавлӑ медпулӑшу подстанцине кайнӑ. Анчах унта алӑк хупӑ пулнӑ. Хайхискер фельдшер тухасса кӗтсе тӑнӑ.

Кӗҫех алӑк уҫӑлнӑ, пӑшал тытнӑскер арҫын мӗлкине курсан пенӗ. Анчах ҫав ҫын фельдшер мар, васкавлӑ медпулӑшу машинин водителӗ пулнӑ. Суранланнӑ арҫын ҫавӑнтах вилсе кайнӑ.